التالي

جفاف أنهار أوروبا وغرق مدينة الاسكندرية

6 المشاهدات· 08/22/22
ksanews
ksanews
0 مشتركين
0

حلقات مقترحة
سرقة مياه العراق
https://www.youtube.com/watch?v=P-ORDJPdJEg
سرقة الأمطار
https://www.youtube.com/watch?v=dIdxVYM8bjk


الصورة دى لنهر لوار فى فرنسا.. النهر ده من أطول الأنهار هناك.. وبينبع فى وسط فرنسا وبيصب فى المحيط الأطلسى.. حضرتك تقولى أنهار ايه ومحيطات ايه يا أبوحميد.. أنا مش شايف فى الصورة غير شوية رمل.. أقولك الله ينور عليك سيدى المواطن.. صحيح الصورة مفيهاش مايه.. لكن اللى قدامك ده واحد من أهم الأنهار فى فرنسا كلها.. واللى حصل ان الميه اللى فيه اختفت.. وهنا بنرجع أنا وانت لتصريح رئيس وزراء بريطانيا بورس جونسون اللى قاله من فترة فى مؤتمر للمناخ.. قال بالنص ان مدينة اسكندرية هتختفى بسبب تغير المناخ وارتفاع درجة حرارة الأرض.. حضرتك تقولى اسكندرية بتاعتنا.. أقولك أيوة سيدى المواطن اسكندرية بتاعتنا.. وقتها الناس موقفتش أوى عند تصريح رئيس الوزراء البريطانى.. لكن النهاردة الكل أدرك ان تصريحه مرعب.. طيب ليه الناس أدركت أهمية التصريح ده دلوقتى؟.. لأن فى اللحظة اللى بكلمك فيها دى.. أوروبا كلها بتعانى من جفاف الأنهار.. أنهار أوروبا معدش فيها مايه.. لدرجة ان الناس بتنزل تلعب فيها كورة.. زى ما حضرتك شايف كده..

حضرتك تقولى ازاى ده حصل وليه؟.. وأوروبا هتعمل ايه فى الكارثة دى؟.. وهل جفاف أنهار اوروبا ده معناه ان الدلتا واسكندرية عندنا فى مصر هيغرقوا؟.. أقصد يعنى مصر والدول العربية هتتأذى من تغير المناخ اللى بيضرب أوروبا ده؟.. هقولك سيدى المواطن..

لكن عاوزك وانت بتسمع مأساة أوروبا اللى هحكيهالك دلوقتى.. تفتكر مأساة أهلنا فى العراق وسوريا نتيجة السدود اللى بنتها تركيا على أنهار دجلة والفرات.. ده غير ايران اللى منعت ماية الأنهار اللى بتغذى نهر دجله.. وبالتالى منسوبه قل.. لدرجة ان الأطفال فى سوريا والعراق بينزلوا يلعبوا فيهم كورة.. لك أن تتخيل ان اللى عملته ايران ده حرم العراق من 7 مليار متر مكعب من ماية الشرب.. أما اللى عملته تركيا فى العراق فيكفى أقولك ان سد اليسو اللى تركيا بنته على نهر دجلة لو استمر فى حرمان العراق من الماية... هيتسبب فى جفاف أكتر من 7 مليون دونم من الأراضى الزراعية.. والدونم ده فى العراق بيساوى 2500 متر مربع.. يعنى اضرب 7 مليون دونم فى 2500 متر والناتج هيكون مساحة الأرض الزراعية اللى هتختفى فى العراق.. ده غير إن 70% من الأراضى الزراعية العراقية فى المحافظات الوسطى والجنوبية اتصابت بالتصحر.. والتصحر ده معناه ان الأرض الزراعية تبوظ لدرجة انها تتحول لأرض صحراوية.. حكيتلك قصة حرمان سوريا والعراق من المايه فى حلقة منفصله اسمها سرقة مياه العراق.. تقدر ترجع لها لو حابب تعرف تفاصيل أكتر..


خلينا دلوقتى فى أنهار أوروبا وعلاقتها بمصر.. جفاف أنهار أوروبا ده راعب حكومات أوروبا لأكتر من سبب.. أولها مثلا ان درجة الحرارة لما عليت عندهم.. المايه فى الأنهار مش بس اختفت.. ده اللى باقى منها دفي.. دفى يعنى درجة حرارته عليت.. وبالتالى المايه بقت غير صالحه لتبريد المفاعلات النووية.. انت شفت مجرد غياب المايه البارده عن أوروبا عمل ايه؟.. أثر على المفاعلات النووية..

الأخطر من كده ان الأنهار فى أوروبا وسيلة مهمه جدا لنقل البضايع والمواد الغذائية.. وعلشان تدرك حجم المشكلة خلينى أقولك ان أوروبا بتنقل عن طريق الأنهار دى طن مواد غذائية سنويا لكل مقيم فى أوروبا.. مش كل مواطن.. كل مقيم.. بيوصله على مدار السنه طن مواد غذائية عن طريق الأنهار.. طيب لما الأنهار دى تنشف هيبطلوا ينقلوا البضايع دى مثلا؟.. الإجابة طبعا لأ.. لازم ينقلوا الأكل والشرب والبضايع.. علشان الناس تاكل وتعيش.. فاضطرت الحكومات فى أوروبا انها تنقل نفس البضايع دى عن طريق البر.. يعنى العربيات هى اللى تنقلها.. حضرتك تقولى طيب ما كده المشكلة اتحلت.. أقولك بالعكس دى زادت.. لأن لما الضغط زاد على الطرق البرية.. الشاحنات زودت أسعار النقل 30%.. وبالتالى سعر البضايع نفسه زاد على المستهلك 30%.. يعنى حضرتك مثلا – مثلا يعنى - لو كنت بتشترى كيلو السكر بـ 100 جنيه.. فدلوقتى سعره زاد لـ 130 جنيه.. ده غير الوقت اللى الأنهار كانت بتوفره فى عمليات النقل دى.. لا اشارات مرور ولا زحمه ولا كلام فارغ من ده.. والأهم ان حمولة السفينة الواحدة أضعاف أى عربية نقل.. وبالتالى اللى كنت بتنقله فى سفينه واحده.. دلوقتى محتاج تنقله فى أسطول عربيات نقل.. فالموضوع بقى صعب جدا.. وفعلا أعلنت شركات شحن كبيرة زى شركة كونتارغو للنقل والإمداد.. انها هتوقف نقل بضايعها فى نهر الراين لحد ما يشوفه اذا كان هيتملى مايه تانى ولا موضوع الجفاف ده لسه مطول.. نهر الراين ده فى ألمانيا لكن بيمر على سويسرا وهولندا وفرنسا.. يعنى جفاف نهر واحد ضرب 3 4 دول فى أوروبا..


فالحكومات الأوروبية فوجئت بإنها خسرت 80 مليار يورو كانت بتوفرها الأنهار دى لما يتم استخدامها فى نقل البضايع والسلع.. تخيل سيدى المواطن ان دول منطقة اليورو كانت بتكسب 80 مليار يورو سنويا من شوية الأنهار اللى عندها.. نعمه كبيره من ربنا.. والأخطر من كل اللى فات ان دول أوروبا لما روسيا قطعت عنها الغاز.. بدأت ترجع تستخدم الفحم من تانى بكميات كبيرة كبديل للطاقة.. والفحم ده كانت بتنقله فى الأنهار.. ودلوقتى الأنهار جفت.. وروسيا قاطعه الغاز.. والمايه اللى كانت بتبرد المفاعلات النووية درجة حرارتها عليت.. يعنى أوروبا تقريبا خسرت أهم مصادر الطاقة.. فى الوقت اللى داخلين فيه على الشتاء.. سيدى المواطن أوروبا دلوقتى ينطبق عليها الحكمة العظيمة اللى بتقول.. وينتر اذ كمنج..


من المصادر
https://on.wsj.com/3AqEnBf
https://bit.ly/3dBXzTG
https://bit.ly/3PtTnmm
https://bit.ly/3C80PAF
https://bit.ly/3PusXAM
https://bit.ly/3SUrpTA
https://bit.ly/3A1Ab9P

#المواطن_سعيد #أنهار_أوروبا

أظهر المزيد

 0 تعليقات sort   ترتيب حسب


التالي